Op zaoterdag 29 november is Stan Thehu oetgerope tot nuie Hertog vaan CV de Mineurs. Heer zal us veur goon in de vastelaovend vaan 2026 in ’t Hertogdom vaan Mestreech.

Euze Hertog Stan woent same mèt zien vriendin Glenn in hun hertogelijk palies te Belfort.

In ‘n cortège ginge de Mineurs mèt hunne toen nog groete oonbekinde op weeg vaan kaffee Naovenant de brusselsestraot umhoeg naor Bernaards, boe al väöl lui hun stonde op te wachte. De cortège woort opgeluusterd door de sjieke klaanke vaan sambaband Amistura en zaate herremenie Oet de kuns.

          

Veur ’t oetrope maakde de Mineurs hun nui medaaje bekind vaan 2026. De nui medaaje zal in ’t teike stoon vaan us twie marketensters Sylvia en Kim. De marketensters zörge gedurende ’t sezoen d’r veur dat ’t euze Hertog en zien vriendin aon niks ontbrik en dat de hiere Mineurs d’r proper bei laope. Ouch zörge zie dat ’t tönneke altied good gevuld is mèt us levenselixer: ’t els lavera!

Nao ’t oetrope woort ’t nui vastelaovendsleedsje “vastelaovendssnuutske” vaan 2026 ten gehuure gebrach en wee kin dat noe beter zinge daan de Jatsers zelf.

’t Waor ‘ne manjefieke aovend en ‘ne gooje start vaan ’t Mineurseizoen.